Cara Adriana, mi è tornata a mente questa poesia scritta più di 15 anni fa, sempre attualissima...Dedicata a te....
LINA LA MATTINA (Grande e storica poetessa della Resistenza siciliana.....)
A TIA BEDDA CALABRIA
Ti vitti bedda e sulitaria comu stidda luntana
'ntisi lu ciaru, lu sapuri, lu scantu e la frevi
e comu duci vilenu, mi trasisti dintra li vini.
Forsi li macchi di culura ca mitragghianu
di ciuri lu celu, lu girsuminu ca ti vesti di riggina
o l'aspri muntagni comu lumiuna, mi ficiriru
di tia annamurari, 'mbriacari di ciaruri?
Forsi la gerbera gialla... suli d'austu c'annorba
curaggiu di fimmini comu Adriana Musella
o l'occhi di la genti chi quadia lu cori e l'arma?
Forsi pirchì si soru a la me' terra e cu idda sparti
chiantu e duluri... o pirchì nta li stissi culura
azzulati s'arricentanu celu e mari..
ma iu oh bedda Calabria arreri vogghiu turnari!
Vogghiu turnari pi mettiri idita e sali nta li to' chiaj
fari guerra comu 'n Sicilia la facemu d'anni...
pi spirtusari, arrimuddari, scrustari, cuscenzi
addummisciuti sutta veli d'indiffirenza...
Senza piatà né scantu di mafia e 'ntrànchita, parrari
scippari di li cannarozza cu la spata e la ducizza
di la puisia, l'amaru muccuni ca ti fannu manciari.
No Calabria, iu non ti sugnu figghia!
Ma lu me' cori di pueta puru pi tia e cu tia chianci
comu chianci pi tutti li cosi torti di sta terra...
pi tutti li schìfiarì ca cert'omini fannu...
pi tutti li morti nnuccenti, d'ogni tempu e paisi.
Susiti Calabria, arruspigghiati lu sangu
non stari misa a cuncumeddu a li pedi di picuruna
e malacarni, ca chiantanu cruci e bivinu sangu
comu fici e cuntinua a fari, ogni vota
ca perdi la mimoria, puru la me' Palermu!
Aisa la testa, pigghia la spata pi la punta
cummatti... 'nsemmula a tutti li figghi chiù onesti!
Ammustra a tutti lu to' curaggiu, talia grittu
nta l'occhi lu nnimicu, punta lu iditu... e spara virità
e sintenzi, jnchi ogni ghiornu di gerbera e spiranzi...
Non sulu st'antica, ciarusa terra, ma lu munnu sanu!
19 aprile 2000
Tratta dal 3° volume di poesie di LINA LA MATTINA
(PARABULA SIGNIFICA) 1° Edizione 2004, 2° Edizione 2007 Città di Palermo. Consiglio Comunale. Ufficio di Presidenza.
AM
